البنت عاوزة اية من خطيبهااااا؟؟؟؟؟؟

البنت عايزة أيه من خطيبها

[ندعوك للتسجيل في المنتدى أو التعريف بنفسك لمعاينة هذا الرابط]

<BLOCKQUOTE></BLOCKQUOTE>كان جالنا أقتراح من الملاح التائه كان عايزنا نتكلم عن علاقتنا مع ناس كتيرة زى الأب والأخ والخطيب والزميل كان عايز يعرف أحنا عايزين أيه من كل واحد وايه اللى بيخنقنا منهم وايه اللى بيسعدنا
بداية هنبدأ من الخطيب خليكوا معايا بقى ويالا نبدأ

عادة بتبدأ العلاقة بين الفتاه والشاب قبل ما يوصلوا لمرحلة الخطوبة بزيارات عائلية من الشاب وأسرته للفتاه
فى البداية أحب أقول لكل شاب ياريت ما تعتمدش على الشكل بس يعنى مش علشان لاقيت واحدة حلوة يبقى خلاص هيا دى وياريت ما تتعاملش مع البنت كأنها سلعة وأنت رايح تشتريها
أكتر حاجة بتضايق البنت وبتزعلها أنها تحس كأنها بضاعة وكل شوية زبون جاى يشوفها وينقى ويختار فعلا اللى بيحصل ده من أى شاب ومن أسرتة بيجرح البنت جدا وممكن يعمل لها عقدة من الجواز كله
أكتر حاجة بتفرح البنت وبتسعدها فعلا أنها تلاقى الشاب ده عايز يتكلم معاها قبل أى حاجة علشان يقدر يفهم دماغها وفكرها وشخصيتها لأن الشكل لوحده مش كل حاجة وهيا كمان بتكون عايزة تتكلم مع الشاب وتعرف طريقة فكرة وشخصيتة ودماغه فيها أيه
وياريت الطرفين يتميزوا بالصراحة لأنها أقصر الطرق لكل حاجة وكل ما كانت الصراحة موجودة كل ما زاد الأحترام بين الأتنين وياريت نتكلم عن كل حاجة عن حياتنا وفكرنا وشغلنا وكل حاجة علشان كل طرف يعرف أيه اللى مش عاجب الطرف التانى لأن أكيد رد الفعل هيبان وبلاش نخبى حاجة علشان ما تحصلش مشاكل بعد كده

يعنى من البداية الأختيار مش بيكون بالشكل بس لازم الأتنين يتكلموا مع بعض ويوضحوا لبعض كل ظروفهم
وساعتها هيقدر كل طرف يحدد بموضوعية شديدة هو هيقدر يكمل مع التانى ولا لا وطبعا الموضوع مش بيجى من زيارة واحدة أو مرة واحدة تتكلموا ممكن مرتين ثلاثة وده طبعا بيكون فى البيت بالطريق السليم فاهمنى طبعا
لو حصل بقى قبول من الطرفين وكل طرف حس بالأرتياح للطرف التانى وبأنه فعلا فيه صفات كتيرة هو حاببها وعايزها فى شريك حياته بتبدأ بقى الخطوات اللى معروفة لينا كلنا من أتفاقات وحاجات كتيرة مفيش داعى ندخل فيها ولكن سريعا هقول لكل أسرة عندها فتاه أنتوا بتشتروا راجل هياخد بنتكم عنده المفروض تبصوا لأخلاقة مش لفلوسة ولا عنده عربية ولا الحاجات دى وبلاش تغالوا فى الطلبات لان المهم أنه يكون واحد يقدر يحافظ عليها وتكونوا أنتوا مطمنين وهيا معاه وكمان بقول لكل شاب بلاش تدور على الواحدة اللى عندها فلوس أو اللى أهلها أغنياء دور على الأصل الكويس والأخلاق 0
خلاص كل حاجة تمت وأتفقنا ودلوقتى بقينا مخطوبين أيه بقى اللى كل طرف محتاجة من التانى طبعا فى الأول بيكونوا الأتنين لسة فى مرحلة تعارف وبيعرفوا بعض أكتر ويوم ورا يوم هيفهموا بعض جدا وكل واحد هيفهم طبيعة التانى

البنت بقى محتاجة أيه من خطيبها يااااااااااااااااه حاجات كتيرة خليكوا معايا
أولا بتكون عايزة تحس أنه بيحترم فكرها وشخصيتها وأنه بيقدرها

ثانيا لو كانت بتشتغل بتكون محتاجة تحس بأهتمامه بشغلها وباللى هيا بتعمله ومش شرط يكون فاهم شغلها ومش شرط يعرف تفاصيل لو هو مش عايز كده بس صدقونى لما بيحسسها بأهتمامه ده ويسألها عن شغلها ويهتم أنه يسمعها وهيا بتتكلم عن طموحها ومستقبلها المهنى حتى لو ماكانش فاهم فى شغلها كتير ده بيحسسها بسعادة كبيرة جدا وبأنه فعلا بقى معاها فى كل حياتها
وكمان أى واحدة بتحب خطيبها يتكلم معاها عن شغله حتى لو ماكنتش هيا فاهمة فيه بس مجرد أنها تحس أنه بيشاركها حياته ده بيسعدها برضة جدا وأكيد بيسعده وياريت كل واحد يتنازل عن نظرية أنه مفيش داعى أحكى لخطيبتى على شغلى وعلى أى مشكلة بتحصل لأن مفيش حاجة فى ايدها تعملها لا لا صدقنى انت ممكن تكون حاسس أنه مفيش داعى لكن لما هتحكى أكيد هتحس براحة ولما هتحس أنها مبسوطة ده أكيد هيسعدك
يعنى ياريت كل طرف يهتم بشغل التانى وبلاش كل طرف يقول ما هو مش فاهم فى شغلى ولا هيا مش فاهمة فى شغلى ولما تلاقى خطيبتك فرحانة بأنجاز هيا عملته فى شغلها ياريت تحاول تشاركها الفرحة حتى لو الموضوع ده مش فى أهتمامتك بس بلاش تحسسها بعدم أهتمامك بالموضوع

ثالثا تبادل المشاعر وطبعا مش بالكلام بس ياريت فعلا لما تكون جواك مشاعر حلوة لخطيبتك تحاول تعبر عنها مش مهم بالكلام ولكن بالمواقف والأفعال حسسها فعلا أنها فى بالك وعقلك وقلبك ومفيش مانع من الكلام ولكن لو مش عارف تقول كلام يبين مشاعرك حسسها بأهتمامك وبلهفتك عليها بمكالمة تليفون بزيارة صدقنى ده هيفرق كتير وزى ما هيا بتديك مشاعرها وقلبها وعقلها وبتحاول تحسسك بمشاعرها بكل الطرق ياريت أنت كمان ما تتجاهلش ده يعنى مثلا لما هيا تبعت لك رسالة على الموبايل فيها كلام حلو أنت بقى تعمل أيه تتجاهلها وما تردش عليها وكمان ما تحاولش تتصل بيها
أستنى بقى معايا الموقف ده كفيل بأنه يهد حاجات كتيرة حلوة جوة خطيبتك ممكن ترد عليها برسالة فيها أى كلمة ومهما كانت بسيطة صدقنى هتفرق معاها ممكن تتصل بيها وتتكلموا فى أى حاجة لكن ما تتجاهلش مشاعرها مهما كانت

رابعا لو كان ظروف شغلك بتضرك أنك تسافر بعيد عن مكان أقامة خطيبتك ومش بتشوفها غير مرة كل شهر أو أتنين ودلوقتى مفيش غير التليفون أعتقد مش كتير عليها تكلمها كل يوم أو يومين تطمن عليها ولو حتى كانت المكالمة عبارة عن أزيك عاملة أيه وخلاص ومهما كنت مشغول بلاش تتجاهلها لان ده بيفرق معاها جدا يعنى كفاية أنكم مش بتشوفوا بعض كمان مش هتتكلموا فى التليفون النقطة دى مهمة قووووووى وياريت نخلى بالنا منها هلاقى طبعا واحد يقولى أنا بيكون عندى شغل ومش فاضى حتى لو عندك شغل يعنى مفيش ولا دقيقة بتكون فاضى فيها يعنى أنت مش بتاكل ومش بتنام بتلاقى وقت للحاجات دى أزاى يعنى دقيقة مش هتخسر فيها حاجة وصدقنى هتفرق معاها كتير وزى ما هيا بتحاول تكلمك وبتبعت لك رسايل أنت كمان حسسها أنك فاكرها وأنها على بالك حتى لو أنت مشغول لأنها وهيا فى عز شغلها وأى مسؤليات عندها بتكون فكراك

خامسا أهتم بأسرتها على قد ما تقدر بلاش تحسسها أنه مش همك حد من أهلها وأنها هيا بس اللى تخصك لأن زى ما آهلك مهمين عندك وهيفضلوا قريبين منك حتى بعد ما تتجوز هيا برضة أهلها مهمين عندها وهيفضلوا قريبين منها حتى بعد ما تتجوز يعنى الأهل هما أهم شىء فى حياتنا عمرنا ما هنستغنى عنهم مهما حصل
وزى ما هيا بتهتم بأهلك وبتتصل بيهم وبتحاول تقرب منهم أنت كمان أعمل كده حتى لو مرة كل شهر أتصل بيهم وأطمن عليهم بلاش تكتفى بأنك بتبعت لهم السلام معاها صدقنى ده هيفرق كتير معاها

سادسا الصراحة كل ماكنت صريح معاها ومع نفسك ده هيقصر الطريق بينكم قوى مهما كان اللى عندك صعب حد يتحمله لازم تكون صريح معاها وما تخبيش عليها حاجة فى حياتك زى ما هيا صريحة معاك لازم تكون أنت كده والصراحة فى كل شىء وياريت كل طرف يقول للتانى هو محتاج منه أيه وعايزة يتعامل معاه أزاى ولما يعمل حاجة تضايقة يقول على طول لو أتبعنا الطريق ده فى علاقتنا صدقونى هنعيش حياتنا صح ومش هتكون فى حاجة جوانا مزعلانا من الطرف التانى

سابعا ياريت ما تستهونش بمشاعرها ولما تلاقيها زعلانة أو مضايقة من أى حاجة حاول تسمعها وتخفف عنها هيا بتكون محتاجاك قوى فى الموقف ده بتكون محتاجة تتكلم معاك وتفضفض ليك وكمان تعيط قدامك ومش قدام أى حد تانى بلاش تحسسها بأنها عملت ذنب لما حبت تتكلم معاك وتقول لها أنتى هتنكدى عليها أنا عندى شغل ومش فاضى للكلام ده صدقنى لما هتقول لها كده هتسبب لها جرح كبير قوى ومش هتقدر تداوية بعد كده أسمعها زى ما هيا بتسمعك لما يكون عندك مشكلة وبتحاول تخفف عنك بلاش تكون أنانى وحسسها فعلا بأنها مهمة عندك

ثامنا الصداقة لو اتعلمنا نكون أصدقاء مع بعض ده هيقربنا أكتر وهيخلى لعلاقتنا شكل تانى ما هو لازم كل طرف يكون للتانى حاجات كتير يعنى مثلا الواحدة محتاجة خطيبها يكون زى باباهاوأخوها وصديقها وحبيبها وطبعا مش كل ده مرة واحدة ولكن فيه مواقف بتتطلب أنه يكون زى باباها فى حنيتة مثلا وهكذا لباقى المواقف ياريت نتعلم نبقى كده وأكيد كل واحدة لازم تكون كده لخطيبها

---------------------
دلوقتى أنا قلت اللى جوايا واللى عندى وعارفة أنى طولت عليكم بس كنت حابة أجمع ليكم كل حاجة وأكيد لما هفتكر أى حاجة تانية هكتبها لأن الموضوع محتاج كلام كتير وأكيد صديقاتى البنات عندهم اضافة للموضوع وهنكملها فى مواضيع تانية أن شاء الله
مستنين كل آرائكم وملاحظاتكم وأقتراحاتكم كمان لأفكار جديدة معانا
ومستنية الشباب يعلقوا ويبعتوا لنا هما عايزين أيه من الأنسانة اللى هما مرتبطين بيها وهنزل أفكاركم ومواضيعكم علشان نعرض وجهه نظركم أنتم كمان وعلشان كلنا نستفيد

فين ردودكم يا اعضاء منتدانا؟؟؟؟؟؟؟؟؟؟؟؟؟؟

تسلم ايديك

ميرسي يا عسل

شكرااااااااااااااا

» عاوزة تشوفى شخصيات مسلسل حريم السلطان الحقيقين!!
» عاوزة جسمك يبقى زى الوردة تعالى وانا اقولــــــــــــــــك وصفات رائعة للجسم
» اعرف البنت من حركاتها ايه شخصيتها؟
» الفرق بين البنت المحترمة والمش محترمة!!!!!!
» إنفلونزا العنوسة.. اللي خلّت البنت "موكوسة"!!